सखी रे चल ने यमुना तीर (मैथिली गीत)
सखी रे चल ने जमुना तीर
( गीत)
सखी रे चल ने जमुना तीर
जमुना तीरे गाछ कदम छै
पाते पाते फुल लटकल छै
भंवरा गावै गीत
सखी रे चल ने जमुना तीर !
लहरि लहरि क’ डारि कदम्ब के
चहुं दिशा में सुरभि पसारै
लिहुरि लिहुरि जमुना जल उड़वै
पागल करै समीर
सखी रे चल ने जमुना तीर !
मंद मधुर मुरली धुन बाजै
हृदयक तार रहि रहि क' कांपय
चरण नहिं मानै बात सखीं रे
उठि उठि भागै तीर
सखी रे चल ने जमुना तीर !
तरुक कुंज मे मदन बैसल छथि
राग रागीनी घेरने चहुं दिश
रहि रहि मयुरा नाच देखाबय
मन भेल बहुत अधीर
सखी री चल ने जमुना तीर !
डॉ प्रमोद कुमार
पांडिचेरी, 15-04-2020
Comments
Post a Comment