मोटर साइकिल (बीहनि कथा)

                                    

ऐं रौ छौंड़ा! भुटवा?? की रौ ?केमहर सुरूज उगलै आई रौ? 

केकर मोटर साइकिल उठा अनलिही रौ! 

मोकना कें त’ विसवासे नहिं भेलै! काइल्ह तक ई छौंड़ा महींस चरबै छल आ आइ मोटर साइकिल! 

हो न हो केकरो वला मांगि अनने हैत। खाई लै लाई ने आ... कथीदन लै बिलाई! मोकना मोने मोन 

बुदबुदैल। 

केकर ल ‘अनलिही रौ? 

हमरे छियै हौ, मोकना भैया। 

आएं रौ! कटै छैं घिसियौट आ किनै छैं मोटरसाइकिल! बड नीक। क’’’ केना किनलिही से कनि बता न हमरा। 

नैं बुझलहक? महींस बेच देलियै। 

की!!!!! महींस बेच देलही। नहिं नहिं ई काज नीक नईं भेलौ। 

अच्छा बता,” भैंस बेच क’ मोटरसाइकिल भ’गेलौ”?

मोटरसाइकिल! देखहक ने! ई फोनो किन लेलियै! 

वाह तों त’ बड़ होशियार निकललैं रौ भुटवा। 

हे सुन न! केकरो कहियै नहिं। “एकटा हमरो किना दे न।“

तों कत’ स किनबहक! तोरा ने खेत पथार छ आने माले जाल! 

हे रौ! बुरबक कहीं के! एक कट्ठा घरारी छै ने वैह बेच देबै। 

बाप रे! तों की बजै छ हौ! कक्का त' सोगे मरि जेथुन्ह! 

ओनाहिंयों आव ऊ लटकले छथि। कत्ते दिन जीता। 

चल हमहूं एकटा खरीदिये ली। गदहा जनम त’ तरि जैत। 

लेखक—प्रमोद कुमार उर्फ “नेहरू लाल दास “ ।पॉंडिचेरी. 02-02-2019.pramod_drpk@yahoo.co.in