होली के हुड़दंग
एक हाथ मे रंग लेने छथि
एक हाथ पिचकारी
गली गली मे घुमैथ कान्हा
ताकैत राधा प्यारी ।
जोगिरा सारा रा रा !
ढ़ोल मजिरा बाजि रहल छै
बजै छै मृदंग
कान्हे संगें नाचै सबकोई
मचल छै हुरदंग
जोगिरा सारा रा रा !
क्यो मारै पिचकारी पिच पिच
क्यो उड़वै गुलाल
युवक युवती मौज मनावै
बुढ़वा भेलै बेहाल
जोगिरा सारा रा रा !
पुआ पुरी खाकऽ सबके
पेट भेल छै टंच
उपर सं भांगक गोला दऽकऽ
नाचै छमाछम
जोगिरा सारा रा रा !
के अमीर के गरीब छै भैया
के उंच के नीच
सब त' एक्कै रंग रंगल छै
होली छै बड़ नीक
जोगिरा सारा रा रा !
डॉ प्रमोद कुमार
पांडिचेरी,09-03-2020
Comments
Post a Comment